Բաժնուած կղզին

Առօրեայ լրագրողական նիւթերէն դուրս մնացած “Կիպրական հարց”ին մասին սոյն աշխատութիւնը շատ արագ մարմին ստացաւ, շարադրուեցաւ ու Նիկոսիոյ մէջ ի մի բերուած բոլոր զրոյցները վերածուեցան գրքոյկի մը։ Ծանօթացման հատոր համարենք այս գիրը, որուն իրենց անմնացորդ եւ նուիրական մասնակցութիւնը ունեցաւ հայկական համայնքի ճանչցուած անդամներուն կարեւոր մէկ տոկոսը։

Նիկոսիոյ սիրտը “հատող” “Կանաչ գիծ”ը առաջին անգամ տեսած եմ տարիներ առաջ։ Այդ գիծին հետ “հանդիպում”ը եղած է շատ պատահական, առանց “Կիպրական հարց”ի հիմքերը հասկնալու, իսկ այս հատորով մատուցուածը պարտիմ համարել “Վիրաւոր կղզի”ով մէկ նաւարկում մը, որ իմ  եւ ընթերցողին առջեւ պիտի բանայ նոր հորիզոններ․․․