Հայոց պատմութիւն․ Ռուբինեանց շրջանէն մինչեւ այսօր

Հին ժամանակներէն ի վեր բազմաթիւ հայեր բնակած են Կիլիկիոյ մէջ։ Մասնաւորաբար Բագրատունեաց թագաւորութեան անկումէն (1045), Անիի գրաւումէն եւ Հայաստանը սելճուկեան տիրապետութեան ենթարկուելէ ետք, մեծ թուով հայեր ԺԱ․ դարուն գաղթեցին ու հաստատուեցան Կիլիկիա։

Կիլիկիա մասնաւոր ցեղեր չէ ունեցած իբրեւ մնայուն բնակիչ։ Անոր տիրած են պարբերաբար շատ մը ազգեր, ինչպէս հիթիթներ, ասորեստանցիներ, պարսիկներ, հռոմէացիներ, որոնցմէ անցած է բիւզանդացիներու ձեռքը, արաբներ, ապա կրկին բիւզանդացիներ, երբ հայեր հաստատուեցան հոն եւ տէր դարձան անոր։