Հայ մտաւորականներու ձեռբակալութիւնը եւ Այաշի բանտը

Հայ ժամանակակից պատմութեան մէջ 1915 Ապրիլ 24-ը նշանակալից օր մը պիտի մնայ։ Այդ օրն էր որ մեծ փոթորիկին առաջին որոտումները լսուեցան, եւ տրուեցաւ այն նշանը որ պարզուեցաւ, թէ կանխամտածեալ մեծ ոճիրը մօտ էր։

Ապրիլ 24-ը ամենաստորին դաւաճանութեան մը օրն էր։

Ո՞վ գիտէ թէ Իթթիհատ վէ Թէրագգը կուսակցութեան կարմիր կեդրոնին մէջ ո՞ր գիշերը տրուած էր բնաջնջումի հրէշային վճիռը։