Մեթոդաբանական ուղեցոյց Հայրենի աղբիւր այբբենարանի

Տակաւին իր ժամանակին չեխ մեծ մանկավարժ Յ․Ա․ Կոմենսկին նկատած է, որ “լեզու սորվողները կարելի է․․․ դիւրութեամբ յառաջ տանիլ, եթէ կազմուին յատուկ ձեռնարկներ, որ է՝ մէկ կողմէ՝ դասագիրքեր, զորս պէտք է տալ սորվողներուն ձեռքը, միւս կողմէ՝ ձեռնարկներ դասատուներուն համար”։

Ժամանակակից ուսուցումը շատ աւելի բարձր պահանջներ կ՝առաջադրէ դասագիրքերուն, որպէս գիտելիքներու աղբիւրի, աշակերտներու մէջ ինքնուրոյնութիւն զարգացնողի, զանոնք կրթող  ու դաստիարակող միջոցի։ Հետեւաբար՝ այսօրուան դասագիրքերը աւելի քան պէտք ունին մեթոդաբանական ուղեցոյցներու, ըստ էութեան, դարձած են դասագիրքերուն անբաժան ուղեկիցը, անոնց ուսուցողական հնարաւորութիւններուն ու գաղտնիքներուն դուռը բանալին։